Hugarafl hélt upp á það að Auði Axelsdóttur iðjuþjálfa og stofnanda Hugarafls var veittur riddarakross hinnar íslensku fálkaorðu þann 17. júní síðastliðinn fyrir frumkvæði á vettvangi geðheilbrigðismála. Hugaraflsfólk og velunnarar ásamt vinum og vandamönnum Auðar fjölmenntu og var boðið upp á veitingar, ræðuhöld og fleira.
Fögnuðurinn var undirbúinn án vitundar Auðar og kom henni skemmtilega á óvart þegar hún mætti í Borgartúnið og hitti alla. Um kvöldið birtist falleg kveðja með þakklæti á Facebook frá Auði.
„Ég er djúpt snortin yfir lífinu og tilverunni. Í dag mætti ég svo ótrúlegum kærleika, hvatningu og virðingu frá mínu fólki. Mínu fólki í Hugarafli, fjölskyldu minni og vinum. Við fögnuðum Fálkaorðunni með stæl, töluðum, áttum magnaða samveru, fengum ótrúlegar veitingar, ég fékk gjafir og heillaóskir. Ég er þakklát, stolt af mínu fólki og baráttunni okkar fyrir bættu geðheilbrigðiskerfi. Baráttunni er ekki lokið, sameinuðum stöndum vér og látum eigi deigann síga. Fögnum lífinu, kærleikanum og fálkanum góða. Takk fyrir mig elsku fólk ❤️“
Klikkið tók nýverið viðtal við Auði þar sem meðal annars var komið inn á starfsemi Hugarafls, valdeflinguna, batann og baráttu fyrir hugsjónum sem geta bætt geðheilbrigðiskerfið. Auður sem jafnframt er forstöðumaður Geðheilsu – Eftirfylgd, stofnaði Hugarafl árið 2003 ásamt fjórum einstaklingum með lifða reynslu. Markmiðið var að innleiða breytingar á geðheilbrigðiskerfið. Þökk sé þeirra brautryðjendastarfi og með óhefðbundnum leiðum í bataferlinu hafa Auður og Hugarafl rutt veginn með því að innleiða nýja nálgun á þjónustu við fólk með geðræna erfiðleika.
Hægt er að hlusta á þáttinn hér fyrir neðan en þar má einnig sjá nokkrar myndir frá fögnuðinum.
Hugarafl óskar Auði innilega til hamingju með heiðurinn og þakkar öllum sem mættu og glöddust með okkur.